Քարվաճառ այցելելու 19 պատճառ (լուսանկար)

Արցախի հյուսիս-արևմուտքում գտնվող Շահումյանի (առավել հայտնի պատմական անունով` Քարվաճառի) շրջանը հարուստ ու յուրահատուկ գեղեցիկ բնություն ունի: Ամռան երկու ամիսները, հուլիսն ու օգոստոսը, Քարվաճառի շրջան այցելելու լավագույն ժամանակն են: Առանձնացնենք Քարվաճառ այցելելու մի քանի պատճառ: Մյուսները կարող եք ավելացնել ինքներդ` շրջան այցելելուց հետո:

1. Տեսնել Քարվաճառի շատ գեղեցիկ ճանապարհները` լեռներով, կանաչապատ սարերով, մաքուր գետերով ու բարձր ու կապույտ երկնքով:
2. Տեսնել Արցախի հիմնական ջրային զարկերակը, անհավանական գեղեցիկ Թարթառ գետը:
3. Տեսնել Դուտխուի կիրճը` թունելից բացվող բնական պատուհանից:
4. Տեսնել Դադիվանք վանական համալիրը, որի կառուցումն սկսվել է 4-րդ դարից: Դադիի գերեզմանը, որ թվագրվում է առաջին դարով, համարվում է տարածաշրջանում առաջին քրիստոնեական վկայությունը:
5. Տեսնել Զուար գյուղը` իր հայտնի բուժիչ տաք հանքային ջրերով, լողանալ այնտեղ:
6. Տեսնել Նոր Վերինշեն համայնքի մոտ գտնվող միջնադարյան եկեղեցին, որ պահպանվել է ադրբեջանական գերության տարիներին և այժմ գտնվում է բարվոք վիճակում:
7. Տեսնել պատմական Հանդաբերդն ու հանդիպակաց սարի վրա գտնվող եկեղեցու ավերակները:
8. Այցելել միջնադարյան իշխանանիստ Ծար համայնքը, որտեղ ամպերն ու մարգագետինները միահյուսվում են իրար... մոմ վառել ադրբեջանական գերությունից փրկված ու մեզ հասած երկու միջնադարյան եկեղեցիներում:
9. Ծար գնալու ճանապարհին կանգառ անել բնական տաք հանքային բուժիչ ջրերի մոտ:
10. Նույն ճանապարհին լուսանկարվել միջնադարյան կամուրջի մոտ:
11. Քայլարշավ կազմակերպել հեքիաթային անտառների ոլորաններով:
12. Թարթառի կիրճում տեսնել քարերի խելահեղ սիմֆոնիան:
13. Օգոստոսի վերջին ներկա լինել մեղրաքամի գործընթացին, ճաշակել էկոլոգիապես մաքուր մեղր:
14. Նույն ժամանակաընթացքում մասնակցել շրջանում իրականացվող բերքահավաքին, համտեսել արևահամ խնձոր, տանձ, սալոր, անտառային հատապտուղներ:
15. Քարվաճառ քաղաքում այցելել եզակի գեղեցկությամբ հայտնի Սատանի կամուրջը:
16. Իրականում տեսնել Քարվաճառից լուսանկարի տեսքով համացանցում ամենաշատ տարածված տեսարանը` Դաշտակը:
17. Քնել վրանում` աշխարհի ամենաաստղաշատ երկնքի տակ:
18. Քարվաճառի վիքիակումբի հաճելի միջավայրում քարվաճառցի խելացի երեխաների հետ սովորել խմբագրել Հայերեն Վիքիպեդիայում, զրուցել փոքրիկ քարվաճառցիների հետ ու նրանց հետ թեյ խմել:
19. Անբացատրելի հպարտության ապրել` քայլելով ազատագրված հայրենիքում: 

Քարվաճառում ձեզ ընդունելու պատրաստ, Քարվաճառի բնակչուհի Թամարա Գրիգորյան

Լուսանկարները Սևակ Հարությունյանի, Դավիթ Եղիազարյանի, Թամարա Գրիգորյանի