Երեւան-Վանաձոր երթուղի. ինչու՞ չեն բավականացնում երթուղայինները

Ազատ օրերից ու տոներից առաջ Երեւանից Վանաձոր հասնել փորձող մարդիկ կանգնում են մեծ խնդրի առաջ: Երթուղայինները չեն բավականացնում ուղեւորներին: Խնդիրն առկա է տարիներ շարունակ, եւ հիմնականում բողոքում են Երեւան-Վանաձոր երթուղու մշտական ուղեւորները:

Մարդիկ միայն բողոքում են, սակայն համախմբված չեն բողոքում. Երթուղային տաքսի չեղած նրանք գերադասում էին ավելի թանկ գնով տաքսի գտնել, պայմանավորվել վարորդի կամ դիսպետչերի հետ, ով իրենց համար տեղ է պահում: Մարդիկ հարմարվում են, մի հոգի բողոքող ուղեւորին «կռվարար» են կարգում, իսկ այսպես կոչված, «գծի տերերը» օգտագործում են իրավիճակը: 

Այս վերջիններն, իհարկե, շատ լավ գիտեն, որ հատկապես տոներից առաջ ավելի շատ երթուղայիններ են պետք գիծ մտցնել, որպեսզի բավականացնեն ուղեւորներին: Ավելի շատ երթուղայիններ, սակայն, երբեք չեն լինում, եւ երբ 40-60 րոպե սպասած ուղեւորները տեսնում են մոտեցող այդքան ցանկալի երթուղայինը, մոռանալով սեռ, տարիք, հարգանք, միմյանց տրորելով ուղղակի ներխուժում են երթուղային՝ վիրավորելով ու հարվածելով միմյանց:

Մարդկանց այս վարքն ինչ-որ տեղ կարելի է հասկանալ. չէ՞ որ ենթադրաբար հաջորդ երթուղայինը գալու է  մոտավորապես նույնքան ժամանակային ընդմիջումից հետո:

Երբ երթուղայինների պակասի պատճառի մասին հարցն ուղղեցինք Երեւան-Վանաձոր երթուղու դիսպետչերին, վերջինս ասաց. «Քուրիկ ջան, մենք էլ փորձում ենք նենց անենք, որ ավելի շատ ավտո ըլնի»:

Այս ամենին ի հավելում՝ նաեւ թանկացել է նշված երթուղու ուղեվարձ: Եթե նախկինում մարդիկ վճարում էին 1200 դրամ, այժմ ստիպված են վճարել 1400 դրամ:

ՀՀ Կապի եւ տրանսպորտի նախարարության Տրանսպորտի վարչության պետի տեղակալ Դավիթ Մելքոնյանը մեր հետ զրույցում նշեց, որ այո, հնարավոր են նման թերացումներ, բայց պաշտոնյայի կարծիքով դա առանձնապես մեծ խնդիր չէ: Ըստ Դ. Մելիքյանի՝ երթուղիների համար հայտարարվում են մրցույթներ, եւ դրանից առաջ կազմվում է չվացուցակը: Գիծը սպասարկող կազմակերպությունն այլեւս իրավունք չունի փոխել չվացուցակը եւ ավելի շատ երթուղայիններ մտցնել գիծ:

«Միգուցե ուղեւորների հոսքը ճիշտ չի հաշվարկվել, այդ պատճառով էլ որոշ խնդիրներ են առաջանում: Եկող նոյեմբերին նոր մրցույթ է հայտարարվելու գծի համար, եւ նոր ուսումնասիրություններ կարվեն»:

Պաշտոնյան նաեւ խորհուրդ տվեց այս խնդրի կապակցությամբ պաշտոնական նամակ գրել Կապի եւ տրանսպորտի նախարարի տեղակալին:

«Դուք որպես քաղաքացի կարող եք ահազանգել: Ուսումնասիրություններ կարվեն, եւ եթե Ձեր ասածը համապատասխանի իրականությանը, քայլեր կձեռնակվեն»:

Այժմ երթուղին սպասարկում են «Գասուռ» եւ «Ոսկեթեւ» ՍՊ ընկերությունները:

Իսկ երթուղիների սպասարկման որակը վերահսկվում է կամ պետք է վերհսկվի ՀՀ Տրանսպորտային վարչության կողմից:

Թամարա Գրիգորյան 

Նյութը որոշ խմբագրումներով տպագրվել է «Առավոտ» օրաթերթի 19.07.12 համարում: